Eðlismunur er á þeim réttindum sem ávinnast í samtryggingu annars vegar og í tilgreindri séreign hins vegar. Valkostirnir eru báðir góðir, hver sjóðfélagi ætti að meta hvort hann kýs fremur, aukna tryggingavernd sem felst í samtryggingunni eða aukinn sveigjanleika hvað varðar útgreiðslu og erfanleika, sem felst í tilgreindri séreign.

Þess ber þó að geta að einungis er hægt að greiða í tilgreinda séreignardeild af þeim launum þar sem kjara- eða ráðningarsamningar mæla fyrir um slíkt, því er þetta almennt ekki enn valkostur fyrir starfsmenn ríkis eða sveitarfélaga.

Á árinu greiddu 562 sjóðfélagar í tilgreinda séreignardeild Stapa, að auki sendu um 2.400 sjóðfélagar slík iðgjöld til annarra sjóða. Alls framvísuðu um 3.000 sjóðfélagar hluta af iðgjaldi sínu í tilgreinda séreign, þ.e. rúmlega 13% af virkum sjóðfélögum tryggingadeildar.

Greiðslur iðgjalda til tilgreindrar séreignardeildar Stapa hækkuðu lítillega frá fyrra ári og námu iðgjöld samtals 220 m.kr. sem er hækkun um 3% frá árinu á undan. Iðgjöld send til annarra sjóða námu 598 m.kr samanborið við 325 m.kr. á árinu 2023.