Ársskýrsla Stapa

Alls greiddu 21.939 sjóðfélagar iðgjöld til tryggingadeildar á árinu 2019. Fjöldi virkra sjóðfélaga sem greiddu iðgjöld í hverjum mánuði voru 15.200. Iðgjöld ársins án tillits til framlags ríkisins til jöfnunar á örorkubyrði, námu 12.153 m.kr. og hækkuðu um 7,5 % frá fyrra ári.

Meðalaldur greiðenda og aldursamsetning var svipuð og fyrri ár. Stærsti aldurshópurinn var fólk á bilinu 21-30 ára. Karlar eru 53,7% greiðenda og konur 46,3%. Akureyrarkaupstaður var líkt og undanfarin ár stærsti launagreiðandi til sjóðsins.

Lífeyrisgreiðslur tryggingadeildar námu alls 6.408 m.kr. og hækkuðu um 12,9% frá fyrra ári. Á árinu fékk sjóðurinn greiddar 615 m.kr. frá ríkinu vegna jöfnunar á örorkubyrði milli lífeyrissjóða og hækkaði framlagið um 17,2% frá fyrra ári. Framlagið jafngildir um 39% af greiddum örorkulífeyri frá sjóðnum. Lífeyrisbyrði sjóðsins sem hlutfall af iðgjöldum var 50,8% samanborið við 48,6% á árinu 2018.

Á árinu hófu 795 sjóðfélagar töku mánaðarlegra eftirlauna, 365 einstaklingar fengu úrskurðaðan örorkulífeyri, 116 makalífeyri og 87 barnalífeyri. Þá fengu 630 einstaklingar eingreiðslu lífeyris þar sem um lítil réttindi var að ræða. Meðalfjöldi lífeyrisþega í hverjum mánuði var 10.261 og fjölgaði um 642 frá fyrra ári eða um 6,7%.

Fjárfestingartekjur tryggingadeildar námu samtals 29.006 m.kr. og hækkuðu um 188% frá árinu áður. Nafnávöxtun nam 12,9% árið 2019 samanborið við 4,8% nafnávöxtun árið 2018 og raunávöxtun nam 10,0% samanborið við raunávöxtun upp á 1,5% árið 2018. Raunávöxtun og nafnávöxtun sjóðsins undanfarin 10 ár er birt hér að neðan. Tölurnar eru miðaðar við gildandi reikningsskilareglur og eru birtar að frádregnum kostnaði. Tímabil lengri en eitt ár eru reiknuð á ársgrunni.

Árið var afar hagfellt á flestum eignamörkuðum á síðasta ári. Lækkun ávöxtunarkröfu á innlendum skuldabréfum skilaði sér í góðri ávöxtun á innlendum eignamörkuðum, sér í lagi á ríkisskuldabréfum. Ávöxtun á hlutabréfamörkuðum var viðunandi og skýrðist að langmestu leyti af töluverðum hækkunum á Marel. Ávöxtun á erlendum mörkuðum var einnig góð á síðasta ári bæði í erlendri mynt sem og umreiknað í krónur.

Stöðugildi hjá sjóðnum voru 18,5 á árinu samanborið við 18,3 á árinu 2018. Rekstrarkostnaður sjóðsins nam 429 m.kr. og lækkaði um 6,1% á milli ára en hann var 456 m.kr. á árinu 2018.

Lækkun rekstrarkostnaðar má rekja til kostnaðar sem sjóðurinn varð fyrir á árinu 2018 vegna niðurstöðu dómsmáls varðandi starfslok fyrrverandi framkvæmdastjóra sjóðsins.