Ársskýrsla Stapa

Tryggingaeignir, sem innihalda áhættuminni eignir, svo sem innlend og erlend skuldabréf og handbært fé, hafa lækkað úr tæplega 79% í 60% á þessum tíu árum. Ávöxtunareignir sem innihalda áhættumeiri eignir, innlend og erlend hlutabréf ásamt sérhæfðum erlendum eignum, hafa lækkað úr 21% í 40% á sama tíma. Tryggingaeignir hafa haldist í kringum 60% undanfarin ár.

Tryggingafræðileg staða var neikvæð um 0,4% í árslok 2019. Tryggingafræðilega staðan hefur batnað umtalsvert undanfarin tíu ár, en hún var neikvæð um 11,7% árið 2010. Samhliða því að staðan hefur batnað hefur áhættan í eignasamsetningu sjóðsins verið aukin jafnt og þétt.

Á síðastliðnu ári var áfram lögð áhersla á að auka við hlutfall erlendra eigna og ná fram aukinni dreifingu eignasafnsins. Samhliða þessu voru gjaldeyriskaup ársins 6,4 ma. kr. sem var að mestu leyti fjárfest í sérhæfðum erlendum eignum og erlendum skuldabréfum.

Hlutfall erlendra eigna hefur aukist nokkuð frá afléttingu gjaldeyrishafta eða úr 24% árið 2016 í 32% í árslok 2019. Ef horft er á Marel sem erlenda eign þá næmi hlutfall erlendra eigna 35%.

Sjóðurinn trúir því að góðir stjórnarhættir stuðli að góðum og hagfelldum rekstri og þjóni þannig hagsmunum eigenda og annarra hagsmunaaðila til lengri tíma litið. Stapi hefur sett sér ákveðin viðmið í þessum efnum sem nefnast Leiðbeiningar um stjórnarhætti, fyrirsvar og félagslega ábyrgar fjárfestingar.

Stapi er fylgjandi því að innlend fyrirtæki fylgi þeim leiðbeiningum sem Viðskiptaráðs Íslands, NASDAQ OMX á Íslandi og Samtök atvinnulífsins hafa gefið út um stjórnarhætti fyrirtækja.

Sjóðurinn kynnir innlendum aðilum sem sinna eignastýringu fyrir hönd sjóðsins Leiðbeiningar um stjórnarhætti, fyrirsvar og félagslega ábyrgar fjárfestingar og væntir þess að þeim verði hlítt.

Stapi kallar eftir upplýsingum frá eignastýringaraðilum sjóða sem hann hyggst fjárfesta í hvort þeir hafi sett sér stefnu í umhverfis- og félagsmálum í fjárfestingum sínum og fylgi t.a.m. viðmiðum Sameinuðu þjóðanna um ábyrgar fjárfestingar (UN PRI). Slíkar stefnur eða viðmið eru ekki skilyrði fyrir fjárfestingu en verður hluti af heildarmati Stapa á viðkomandi sjóði. Erlendir eignastýringaaðilar í eignasafni Stapa hafa flestir tileinkað sér þessi viðmið í fjárfestingum sínum til margra ára en ánægjulegt er að innlendir stýringaraðilar hafa einnig verið að tileinka sér viðmiðin undanfarin misseri.

Leiðbeiningar Stapa um stjórnarhætti, fyrirsvar og félagslega ábyrgar fjárfestingar 

Eignasamsetning Stapa í árslok var nokkuð í samræmi við samsetningu viðmiðunarvísitölu sjóðsins í árslok 2019 samkvæmt fjárfestingarstefnu. Frávik frá viðmiði er einna helst að finna í erlendum og innlendum skuldabréfum en tilefni þótti til að vinna eftir fjárfestingarstefnu ársins 2020 undir lok árs 2019.

Einnig má nefna að ákveðið var að auka frekar við gjaldeyriskaup með sölu innlendra eigna og hækka þar með hlutfall erlendra eignaflokka á móti.

Allir eignaflokkar skiluðu jákvæðri nafnávöxtun á síðastliðnu ári. Erlend og innlend hlutabréf ásamt sérhæfðum erlendum fjárfestingum skiluðu á bilinu 14,5%-25,1% nafnávöxtun. Innlend og erlend skuldabréf skiluðu einnig góðri ávöxtun eða á bilinu 6,6%-10,1% nafnávöxtun.

Ávöxtunarframlag var mest af ríkisskuldabréfum (3,1%) og erlendum hlutabréfum (5,1%) af heildarávöxtun en um er að ræða stærstu eignaflokka Stapa. Samtals nema þessir tveir eignaflokkar tæplega helming af eignasafni sjóðsins.