Tryggingaeignir, sem innihalda áhættuminni eignir, svo sem innlend og erlend skuldabréf og handbært fé, hafa lækkað úr tæplega 78% í 51% á síðastliðnum tíu árum. Ávöxtunareignir sem innihalda áhættumeiri eignir, innlend og erlend hlutabréf ásamt sérhæfðum erlendum eignum, hafa hækkað úr 21% í 49% á sama tíma. 

Tryggingafræðileg staða var jákvæð um 1,5% í árslok 2020. Tryggingafræðilega staðan hefur batnað umtalsvert undanfarin tíu ár, en hún var neikvæð um 7,5% árið 2011. Samhliða því að staðan hefur batnað hefur áhættan í eignasamsetningu sjóðsins verið aukin jafnt og þétt.

Á síðastliðnu ári var áfram lögð áhersla á að auka við hlutfall erlendra eigna og halda áfram aukinni dreifingu eignasafnsins. Tilfærslur áttu sér stað innan eignasafnsins, vægi erlendra skuldabréfa var minnkað samhliða lækkandi vöxtum og aukið vægi innlendra og erlendra hlutabréfa ásamt sérhæfðum erlendum eignum.

Hlutfall erlendra eigna hefur aukist nokkuð frá afléttingu gjaldeyrishafta eða úr 24% árið 2016 í 35% í árslok 2020. Ef horft er á Marel sem erlenda eign þá næmi hlutfall erlendra eigna um 38%.

Sjóðurinn trúir því að góðir stjórnarhættir stuðli að góðum og hagfelldum rekstri og þjóni þannig hagsmunum eigenda og annarra hagsmunaaðila til lengri tíma litið. Stapi hefur sett sér ákveðin viðmið í þessum efnum sem nefnast Leiðbeiningar um stjórnarhætti, fyrirsvar og félagslega ábyrgar fjárfestingar. Sjóðurinn kynnir innlendum aðilum sem sinna eignastýringu fyrir hönd sjóðsins þessar leiðbeiningar og væntir þess að þeim verði hlítt.

Stapi er aðili að samtökunum IcelandSIF sem hefur það að markmiði að efla þekkingu á aðferðafræði sjálfbærra og ábyrgra fjárfestinga og auka umræður um ábyrgar og sjálfbærar fjárfestingar. Á síðastliðnu ári gerðist sjóðurinn aðili að „Viljayfirlýsingu um fjárfestingar í þágu sjálfbærrar uppbyggingar“ sem unnið var að á vegum Festa – miðstöð um samfélagsábyrgð og sjálfbærni í víðtæku samráði við ful­trúa helstu aðila á fjármálamarkaði.

Stapi kallar eftir upplýsingum frá eignastýringaraðilum sjóða sem hann hyggst fjárfesta í hvort þeir hafi sett sér stefnu í umhverfis- og félagsmálum í fjárfestingum sínum og fylgi t.a.m. viðmiðum Sameinuðu þjóðanna um ábyrgar fjárfestingar (UN PRI). Slíkar stefnur eða viðmið eru ekki skilyrði fyrir fjárfestingu en verður hluti af heildarmati Stapa á viðkomandi sjóði. 

Erlendir eignastýringaaðilar í eignasafni Stapa hafa flestir tileinkað sér þessi viðmið í fjárfestingum sínum til margra ára en ánægjulegt er að innlendir stýringaraðilar hafa einnig verið að tileinka sér viðmiðin undanfarin misseri. 

Í tilfelli erlendra verðbréfasjóða kannar Stapi hvernig sjóðir standa miðað við  opinbert mat MSCI á stöðu sjóða í UFS - málum.

Hér neðar má sjá að 89% af virði erlendra sjóða í eignasafni Stapa er aðili að UN PRI og að einkunnir sjóðastýrenda er ásættanleg. Horft verður til þess að auka enn frekar vægi sjóða í eignasafninu sem hafa mat og einkunn frá UN PRI. Mat MSCI á UFS-málum verðbréfasjóða í eignasafni Stapa er einnig ásættanlegt en með því að fylgast með þessum þáttum má ná fram enn betri árangri til framtíðar.

Leiðbeiningar Stapa um stjórnarhætti, fyrirsvar og félagslega ábyrgar fjárfestingar

Eignasamsetning Stapa í árslok var nokkuð í samræmi við samsetningu viðmiðunarvísitölu sjóðsins í árslok 2020 samkvæmt fjárfestingarstefnu. Frávik frá viðmiði er einna helst að finna í erlendum og innlendum skuldabréfum en tilefni þótti til að vinna eftir fjárfestingarstefnu ársins 2021 undir lok árs 2020.

Vægi hlutabréfa, bæði innlendra og erlendra, í árslok 2020 var einnig yfir viðmiði sem að einhverju leyti skýrist af miklum verðhækkunum hlutabréfa á síðasta ársfjórðungi liðins árs.

Allir eignaflokkar, fyrir utan skammtímabréf, skiluðu jákvæðri nafnávöxtun á síðastliðnu ári. Erlend og innlend hlutabréf skiluðu hæstu ávöxtun eða rúmlega 20% nafnávöxtun hvor eignaflokkur. Innlend skuldabréf skiluðu einnig góðri ávöxtun eða á bilinu 6%-9% nafnávöxtun.

Ávöxtunarframlag var mest af erlendum hlutabréfum (5,1%) og innlendum hlutabréfum (3,3%) af heildarávöxtun. Samtals nema þessir tveir eignaflokkar um 43% af eignasafni sjóðsins.