Eðlismunur er á þeim réttindum sem ávinnast í samtryggingu annars vegar og í tilgreindri séreign hins vegar. Valkostirnir eru báðir góðir, hver sjóðfélagi fyrir sig ætti að meta hvort hann kýs fremur, aukna tryggingavernd sem felst í samtryggingunni eða aukinn sveigjanleika hvað varðar útgreiðslu og erfanleika, sem felst í tilgreindri séreign.

Þess ber þó að geta að einungis er hægt að greiða í tilgreinda séreignardeild af þeim launum þar sem kjara- eða ráðningarsamningar mæla fyrir um slíkt, því er þetta almennt ekki enn valkostur fyrir starfsmenn ríkis eða sveitarfélaga. Væntanlega verður lögð fyrir næsta ársfund tillaga að breytingu á samþykktum, þannig að allir geti greitt í tilgreinda séreign, séu þeir með skylduiðgjald umfram 12%. 

Þetta verður gert með hliðsjón af því að nú má nýta tilgreinda séreign vegna fyrstu íbúðakaupa, ef viðkomandi nær ekki að fullnýta heimild laganna með viðbótariðgjaldi til séreignarsparnaðar.

Á árinu greiddu 482 sjóðfélagar í tilgreinda séreignardeild Stapa, að auki sendu 822 sjóðfélagar slík iðgjöld til annarra sjóða. Alls framvísuðu um 1290 sjóðfélagar hluta af iðgjaldi sínu í tilgreinda séreign, þ.e. tæp 6% af virkum sjóðfélögum tryggingadeildar.

Greiðslur iðgjalda til tilgreindrar séreignardeildar jukust frá fyrra ári og námu iðgjöld samtals 137 m.kr. sem er hækkun um 22% frá árinu á undan. Iðgjöld send til annarra sjóða námu 89 m.kr. samanborið við 25 m.kr. á árinu 2021.