Árið 2025 einkenndist af krefjandi aðstæðum á fjármálamörkuðum, þar sem viðvarandi hátt vaxtastig og þrálát verðbólga höfðu veruleg áhrif á þróun eignaverðs. Þrátt fyrir að verðbólga hafi farið lækkandi þegar leið á árið, héldu seðlabankar áfram aðhaldi í peningamálum sem hafði áhrif á bæði hagvöxt og fjárfestingarumhverfi.

Á Íslandi var verðbólga yfir markmiði og studdi hátt vaxtastig við ávöxtun skuldabréfa. Innlend hlutabréf þróuðust hins vegar með meiri sveiflum og áttu almennt erfitt uppdráttar. Sérstaklega mátti sjá veikleika í vaxtanæmum félögum, en þó var rekstur margra fyrirtækja traustur. Samhliða þessu komu fram skýr merki um hægari hagvöxt og minnkandi spennu í efnahagslífinu.

Á alþjóðavísu var hagvöxtur hægari en áður, en þó héldu hlutabréfamarkaðir áfram að skila viðunandi ávöxtun. Bandarísk hlutabréf, einkum í tækni- og gervigreindargeiranum, leiddu þá þróun og nýmarkaðir sýndu einnig styrk. Verðbólga á helstu mörkuðum fór almennt lækkandi þótt hún væri víða enn yfir markmiðum. Gengisþróun hafði þó neikvæð áhrif á ávöxtun erlendra eigna í krónum talið, þar sem styrking krónunnar gagnvart Bandaríkjadal vó á móti jákvæðri ávöxtun í undirliggjandi eignum.

Heilt yfir var árið því mótað af aðhaldi, aukinni óvissu og mismunandi þróun milli eignaflokka en jafnframt sáust skýr merki um að verðbólguþrýstingur væri að minnka þegar leið á árið.