Hlutverk Stapa er sinna vörslu lífeyrissparnaðar sjóðfélaga og að standa vörð um hagsmuni þeirra. Stapi er meðvitaður um að mestu áhrif lífeyrissjóðs eru í gegnum fjárfestingar og lánastarfsemi og því hefur sjóðurinn sett fram stefnu um ábyrgar fjárfestingar sem tekur á þeim þáttum. Hins vegar er mikilvægt að sjóðurinn sýni gott fordæmi í eigin starfsemi og láti gott af sér leiða fyrir umhverfið, samfélagið, sjóðfélaga, aðra hagaðila og starfsfólk sjóðsins.

Með hliðsjón af þessu hefur Stapi sett sér sjálfbærnistefnu sem tekur á rekstri lífeyrissjóðsins um að horfa til UFS viðmiða Nasdaq um umhverfismál, félagslega þætti og stjórnarhætti (UFS) auk þess að styðja við heimsmarkmið Sameinuðu þjóðanna.

Tilgangur stefnunnar er að skilgreina megináherslur Stapa um sjálfbærni, út frá UFS þáttum og heimsmarkmiðunum og greina þau áhrif sem starfsemi hans getur haft á sitt nærumhverfi. Stefnunni er ekki ætlað að vera tæmandi, öllu heldur að styðja við gildandi stefnur, reglur og leiðbeiningar sem Stapi fylgir.

Ábyrgð með stefnunni er í höndum stjórnar sjóðsins. Framkvæmdastjóri ber ábyrgð á framfylgd hennar og þar af leiðandi að tryggja að starfsfólk Stapa sé upplýst um stefnuna, fái fræðslu um sjálfbærni og geti þannig tileinkað sér hana við dagleg störf. Stefnan skal rýnd árlega og uppfærð eftir þörfum.